كانوا مُزارعين
كانوا مُسالمين
كانوا بحالهِن.
انهَجَم عَليهِن
انسَلبَت أراضيهن
وانتهَب مالهِن.
وقعوا وقاموا
وقاوَموا
ورجع ساء حالهِن.
العُدوانيّين قسَّموا رزقهِن
خَبّوا حَقهِن
وبِقيوا المُزارعين عَلى حالهِن.
شوَي اللي اعتدوا عَليهن
صاروا بدهِن "يطوروهِن"
"ويحَسنولهِن" عيشتهِن
"تطوير الجَليل" كان اسم مُخطّطهِن
مُصادَرة أراضي وحقوق مِش إلهِن
وتَهويد وتَهجير بَس بمَنطق سِياسِتهِن.
رجال العُروبة ما قِبلوا
إنهن يركَعوا و ينذلّوا
أخدوا قرارات
وطِلعوا مُظاهَرات
وهُناك سال دَمهِن.
سال الدَّم بعرّابة
وما هَمهِن
ومَدّ الدّم لسَخنين
وما هَمهِن
وصِل الدّم لكفر كنّا, وما هَمهِن
حَتّى الشّهادة طهّرَت أسمهِن.
نالوها بشَرف وعِزّة وكرامة
كرْمال الدّفاع عَن أرضهِن
وصار كل سنة في ذِكرى إلهِن
شُهداء يوم الأرْض الخالد,
هيك صار أسمهِن.

عَكّا

موقع العرب يفسح المجال امام الكتاب لطرح أفكاركم التي كتبت بقلمهم المميز ويقدم للجميع مساحة حرة في التعبير عما في داخلهم ضمن زاوية منبر العرب. لإرسال المواد يرجى إرفاق النص في ملف وورد مع اسم الكاتب والبلدة وعنوان الموضوع وصورة شخصية للكاتب بجودة عالية وحجم كبير على العنوان:alarab@alarab.net